Інжынер Жодзінскага РЭС распавёў, як пазбегнуць электратраўм

Што рабіць, калі чалавека ўдарыла электрычным токам і як дапамагчы яму да прыезду хуткай дапамогі?

«ЖН» сустрэліся з інжынерам Жодзінскага РЭС Уладзімірам Мінчуком, які расказаў і аб правілах абыходжання з электрычнасцю.

– Як дзейнічае электрычны ток?

– Ток, праходзячы праз цела чалавека, пашкоджвае ўсе органы. У залежнасці ад напругі нават кароткатэрміновы кантакт можа нанесці сур’ёзныя пашкоджанні арганізму.

– Якія траўмы можна атрымаць?

– Траўмы ад электрычнага току размяркоўваюцца на два тыпы: апёкі і ўдары. Апёк паходзіць ад электрычнай дугі, якая ўзнікае пры кароткім замыканні, і чалавек, знаходзячыся зблізку, атрымлівае тэрмічны апёк. Удар – ток праходзіць праз цела пры пэўных умовах: праваднік – чалавек – зямля, і дзівіць, часцей за ўсё, сардэчна-сасудзістую і нервовую сістэмы. Сутарга зводзіць мышцы і сціскае рукі, таму сам чалавек вызваліцца не можа.

– Як аказаць дапамогу пацярпеламу?

– Галоўнае, каб самому не патрапіць пад уздзеянне электрычнасці, не дакранацца да пацярпелага. Першым чынам, варта адключыць ток рубільнікам, аўтаматам, а калі іх няма паблізу, то з дапамогай драўлянай палкі ці дошкі адцягнуць пацярпелага ад прадмета з электратокам ці адкінуць у бок провад. У крайнім выпадку, перасекчы сякерай з драўлянай ручкай провад, можна абматаць рукі тканінай, якая не праводзіць ток, і за адзежу адцягнуць пацярпелага, не дакранаючыся аголеных частак яго цела. Затым, калі чалавек знаходзіцца ў прытомнасці, але дыхае роўна, варта даць панюхаць яму нашатыр, апырскаць галаву вадой або папляскаць па шчоках, увогуле, прывесці ў прытомнасць.

– Як трэба паводзіць сябе каля паветраных і кабельных ліній электраперадачы?

– Нагадваю, што ўздоўж паветраных і кабельных ліній электраперадачы заўсёды ўсталёўваюцца ахоўныя зоны ў выглядзе зямельнага ўчастку і паветранай прасторы, абмежаваных вертыкальнымі плоскасцямі, адлеглымі па абодва бакі лініі ад крайніх правадоў пры неадхіленым іх становішчы на адлегласці: для ліній напругай 1 кілавольт – 2 м, 6-10 кілавольт – 10 м, 35 кілавольт – 15 м, 110 кілавольт – 20 м, для кабельных ліній – 1 м па абодва бакі кабеля. Ні ў якім разе нельга набліжацца да абарваных, якія ляжаць на зямлі, плоце або іншых будынках правадах на адлегласць менш за восем метраў.

Калі выявіце на провадзе лініі электраперадачы расплеценыя жылы, сколы на ізалятарах, да якіх мацуецца провад, адчыненыя дзверы трансфарматарнай падстанцыі або абарваны провад паветранай лініі электраперадачы, неадкладна паведаміце аб гэтым дыспетчару электрасеткі па тэлефоне 6-60-53 – Жодзінскі раён электрасетак.

«ЖН»