У Мінскай вобласці ўбрана 95% збожжавых: ураджай перавысіў 2 млн тон
У Мінскай вобласці ўбрана 95% плошчаў збожжавых. Аб гэтым заявіў журналістам старшыня Мінскага аблвыканкама Аляксей Кушнарэнка, перадае карэспандэнт БЕЛТА.
«Ураджай разам з рапсам складае 2 млн 100 тыс. т, без рапсу — 1 млн 830 тыс. т зерневых. Гэта амаль на 100 тыс. больш, чым у мінулым годзе. І гэтая праца працягваецца. За гэтымі лічбамі стаіць сістэмная праца аграрыяў Міншчыны, рабочых, спецыялістаў, кіраўнікоў. Для многіх гаспадарак і раёнаў Мінскай вобласці гэтыя ўраджаі рэкордныя, як і ў Слуцкім раёне, у якім намалочана звыш 200 тыс.т збожжа з рапсам, — адзначыў Аляксей Кушнарэнка.
Старшыня Мінаблвыканкама павіншаваў камбайнёра з ААТ «Кухчыцы» Паўла Шуцілу, які намалаціў рэкордныя 8 тыс. т збожжа на айчыннай тэхніцы, а таксама вадзіцеля арганізацыі Андрэя Аляксейчыка, які перавёз 7 тыс. т збожжа. Акрамя таго, ён павіншаваў аграрыяў Слуцкага раёна, якія зрабілі гістарычны рэкордны намалот у 200 тыс. т збожжа з рапсам.
«За гэтымі вялікімі лічбамі стаіць ваша штодзённая карпатлівая праца, стаўленне да справы, любоў да роднай зямлі. Гэта не проста лічбы. Гэта сведчыць аб тым, што мы адказна падышлі да выканання тых задач, якія перад намі ставяцца. Галоўная з іх — забеспячэнне харчовай бяспекі Беларусі», — адзначыў Аляксей Кушнарэнка. Ён падкрэсьліў, што такія вынікі — прыклад для ўсіх работнікаў сельскай гаспадаркі Мінскай вобласці, які заслугоўвае павагі і самых высокіх узнагарод.
Па словах Аляксея Кушнарэнкі, за высокімі ўраджаямі заўсёды стаіць няпростая, карпатлівая праца спецыялістаў, якія напрацоўвалі пэўны вопыт з папярэдніх уборачных, шляхам правядзення эксперыментаў, укаранення сучасных тэхналогій. «Мы з гонарам можам казаць, што ўраджайнасць збожжавых на 8 ц/га вышэй, чым у мінулым годзе. Пры гэтым аграрыі, зараджаныя на вынік, разумеюць, што гэта далёка не мяжа. Таму ў краіне зроблена ўсё, створаны ўмовы для таго, каб атрымліваць такія высокія ўраджаі, — адзначыў ён.
Камбайнер з ААТ «Кухчыцы» Павел Шуціла расказаў, што на такія здзяйсненні яго натхняе жонка і трое дзяцей. «Малодшаму хутка тры гады, і ён ужо паспеў праехаць са мной на камбайне», — падзяліўся ён.
Кіроўца-перавозчык у ААТ «Кухчыцы» Андрэй Аляксейчык прымае ўдзел ва ўборачнай ужо 13-ы раз. Паводле яго слоў, адной з матывацый з’яўляецца дастойная заработная плата. «У асноўным гэта дзякуючы калектыву, падтрымцы сям’і, родных, блізкіх, кіраўніка. У нас зямля добрая, дае такія ўраджаі. Ёсць працоўны працоўны азарт. Асабліва калі пераступаеш рысу, якой ты дасягнуў летась. Жадаецца яшчэ больш», — распавёў Андрэй Аляксейчык.
З калегам Паўлам Шуцілам яны разам апрабавалі новую тэхніку выгрузкі на хаду. «Вельмі спадабалася. Нашмат хутчэй набіраем тону. Паспрабавалі — атрымалася. Пачалі працягваць у тым жа духу», — дадаў ён.
Аляксей Кушнарэнка ўручыў падзячны ліст Слуцкаму раёну, які намалаціў 200 тыс. т збожжа з рапсам. Яго атрымаў старшыня Слуцкага райвыканкама Уладзімір Гога, які падкрэсліў, што такога выніку ўдалося дасягнуць у першую чаргу дзякуючы выкананню ўсіх тэхналогій, а таксама тэрмінаў сяўбы, неабходнага аб’ёму ўнясення мінеральных угнаенняў як восенню, так і вясной. «Сёлета ўраджайнасць 61,3 ц/га. Гэта на 14,3 ц/га вышэй за леташні вынік», — адзначыў Уладзімір Гога.