У Мінскай вобласці, здаецца, знайшлі спосаб знізіць падзеж жывёлы і цяпер будуць тыражаваць гэты вопыт
У Мінскай вобласці вызначыліся па тэхналогіях, якія дапамогуць забяспечыць захаванасць маладняку буйной рагатай жывёлы. Адзін з падыходаў заключаецца ў будаўніцтве сучасных прафілакторыяў для цялят. Такі ўзорнапаказальны аб’ект на малочнатаварным комплексе ААТ “Нястанавічы-Агра” наведаў Прэзідэнт Беларусі Аляксандр Лукашэнка, перадае карэспандэнт БЕЛТА.
“Пытанню захаванасці жывёлы ў Мінскай вобласці ўдзяляецца вялікая ўвага. Умовы надвор’я, звязаныя з нізкімі тэмпературамі ў пачатку года, выявілі шэраг праблемных пытанняў. Асабліва ва ўтрыманні маладняку. Частка гэтага маладняку трымаецца непасрэдна на вуліцы. Мы ўбачылі неабходнасць у тым, каб прымаць кардынальныя рашэнні”, – расказаў журналістам старшыня Мінскага аблвыканкама Аляксей Кушнарэнка.
Якраз з гэтай мэтай быў вывучаны вопыт ААТ “Нястанавічы-Агра”, дзе прафілакторый для ўтрымання цялят быў пабудаваны два гады таму і добра зарэкамендаваў сябе на практыцы. “Эксплуатуецца паспяхова. З пачатку гэтага года тут падзяжу практычна няма. Літаральна дзве галавы за два месяцы, і тое з-за аб’ектыўных прычын, звязаных са станам здароўя гэтых жывёл”, – адзначыў кіраўнік рэгіёна.
Паводле яго слоў, прафілакторый у гэтай гаспадарцы вырашылі ўзяць за аснову і па шэрагу іншых параметраў. “Хутка ўзводзіцца, танна і з выкарыстаннем у тым ліку дрэва, якога ў нас дастаткова. Таму было прынята рашэнне пабудаваць на тэрыторыі Мінскай вобласці ў гэтым годзе 111 такіх прафілакторыяў для таго, каб перамясціць туды 20 тыс. цялят, – заявіў Аляксей Кушнарэнка. – Мы пакрокава адпрацавалі, у якія тэрміны, хто і што павінен рабіць для таго, каб гэту задачу выканаць. Літаральна на наступным тыдні плануем сабраць тут усіх старшынь райвыканкамаў для таго, каб яны на ўласныя вочы маглі ўбачыць, як гэта працуе”.
Старшыня Мінскага аблвыканкама канстатаваў, што ў аснове ўсяго павінна быць дысцыпліна і трэба мінімізаваць так званы чалавечы фактар. Для гэтага ў прафілакторыі ААТ “Нястанавічы-Агра” ў тым ліку ўкаранёна сістэма відэакантролю. Таксама ўкараняецца сучаснае абсталяванне.
Акрамя таго, такія навацыі – гэта яшчэ і камфортныя ўмовы для работы людзей, а не толькі ўтрымання жывёл.
Як паведамлялася БЕЛТА, Прэзідэнт Беларусі ў цэлым адобрыў праект, хоць ён і не лічыць гэты варыянт самым бюджэтным: “Павінен сказаць, гэта па-багатаму. Я бачыў і іншыя цялятнікі, прафілакторыі. Калі ёсць грошы – няхай. Але не ўсюды гэта магчыма”.
Аляксандр Лукашэнка нагадаў аб сваім даручэнні, каб у такія месцы пры неабходнасці пераводзілі цялят з суседніх гаспадарак, калі там не будзе магчымасці забяспечыць іх захаванасць.
“Добры прафілакторый. Месяц (размова аб хуткасці ўзвядзення. – Заўвага БЕЛТА). Заказаў гэтыя канструкцыі. Прыязджаеш – штампуй, бетануй. Ніякай складанасці. Таксама – шэфы (могуць аказаць дапамогу. – Заўвага БЕЛТА). Вельмі тэхналагічна, нічога выдумляць не трэба, – сказаў Прэзідэнт. – Добры прафілакторый для цялят. Трэба тыражаваць”.
