Лукашэнка пра адносіны з Расіяй: нягледзячы на розныя гвалты, ідзём тым шляхам, які вызначылі
Беларусь і Расія, нягледзячы на розныя гвалты збоку, выбудоўваюць свае адносіны тым шляхам, які раней вызначылі. Аб гэтым Прэзідэнт Беларусі Аляксандр Лукашэнка заявіў на сустрэчы з міністрам замежных спраў Расіі Сяргеем Лаўровым, перадае карэспандэнт БЕЛТА.
“Нягледзячы на розныя там гвалты і пэўныя выкрыкі (як у нас, так і ў вас, асабліва за мяжой), мы ідзём тым шляхам, які з вамі вызначылі”, – падкрэсліў беларускі лідар.
Ён адзначыў, што міністэрствы замежных спраў дзвюх краін ідуць у авангардзе гэтага працэсу. “Менавіта знешнепалітычныя ведамствы, нягледзячы на абвастрэнне той ці іншай сітуацыі, калі наперад часам вылучаюцца нашы абаронныя ведамствы. Або, як у Амерыцы называюць, ведамства вайны (у ЗША нядаўна Міністэрства абароны перайменавалі ў Міністэрства вайны. – Заўвага БЕЛТА), – сказаў Аляксандр Лукашэнка. – Але толькі ў тым плане, што мы заўсёды рыхтуемся да вайны, каб яе не было. А ў іх там Міністэрства вайны для таго, каб ваяваць кожны дзень. Не дай бог, вядома”.
Прэзідэнт звярнуў увагу, што кіраўнікі МЗС Беларусі і Расіі рэгулярна, як мінімум два разы ў год, праводзяць мерапрыемствы ў двухбаковым фармаце. І гэта апрача сустрэч у рамках міжнародных мерапрыемстваў.
“Мы ж толькі што ў Казані бачыліся. Якраз на АДКБ”, – заўважыў Сяргей Лаўроў.
Аляксандр Лукашэнка прадоўжыў: “Ведаю, што міністр (замежных спраў Беларусі. – Заўвага БЕЛТА) тэлефануе вам часта. Ён мне дакладвае аб гэтым. Вельмі добра, што ў нас такія добрыя адносіны”.
Беларускі лідар адзначыў, што яму вельмі прыемна сустрэцца з Сяргеем Лаўровым і ён чакаў гэтай сустрэчы. “Хацелася б падзяліцца з вамі меркаваннямі, уражаннямі па ўсім спектры міжнароднай абстаноўкі. Не таму, што мы глабальная краіна, як Расія або Кітай, і будзем удзельнічаць у вырашэнні нейкіх праблем, але, тым не менш, хацелася б ведаць, у якім напрамку дзейнічаць і разгортваць нашу знешнюю палітыку. І вы, як чалавек вопытны, мне параіце можа сёе-тое”, – сказаў кіраўнік дзяржавы.
“Прыемныя словы для мяне”, – заўважыў на гэта Сяргей Лаўроў.
“Гэта зыходзячы з таго маштабу, які займае Расія ў міжнародным становішчы… Таму я чакаю больш такой канкрэтнай і шырокай інфармацыі, як у нас звычайна бывае – мы ніколі не ўтойвалі адзін ад аднаго нічога за доўгія гады нашага супрацоўніцтва”, – падкрэсліў кіраўнік дзяржавы.
Аляксандр Лукашэнка ў прыватнасці заявіў аб жаданні абмеркаваць сітуацыю ў інтэграцыйных праектах, уключаючы АДКБ, ЕАЭС, СНД, ШАС – тое, як расійскаму боку і Сяргею Лаўрову асабіста бачыцца гэта развіццё.
Прэзідэнт таксама згадаў яшчэ адну міжнародную тэму на злобу дня: “Сямёрка” (або як яе тут, не ведаю, называць) сабралася”.
“Яны, праўда, сябе “Вялікая сямёрка” называюць. Вялікая Брытанія, “Вялікая сямёрка”…” – адзначыў кіраўнік МЗС Расіі.
“Вядома, вядома. Усе вялікія сабраліся. Таму нам, хочаш – не хочаш, трэба звяртаць на гэта ўвагу”, – заўважыў Аляксандр Лукашэнка.
Ён таксама звярнуў увагу на вельмі вялікую дынаміку па шэрагу пытанняў міжнароднай праблематыкі: “І канфлікты, якія сёння існуюць, – як успрымаюцца яны. Таму ёсць аб чым пагаварыць. І добра, што вы прыехалі да нас з рабочым візітам”.
У сваю чаргу Сяргей Лаўроў адзначыў, што яму таксама вельмі прыемна па запрашэнні Аляксандра Лукашэнкі сустракацца з кіраўніком беларускай дзяржавы. Ён расказаў, што яшчэ напярэдадні была магчымасць абмеркаваць розныя пытанні з беларускім калегам – міністрам замежных спраў Максімам Рыжанковым, і ў рамках рабочага візіту гэта работа будзе прадоўжана.
“Пачалі ўчора ўжо. Сам-насам падрабязна пагаварылі па далікатных рэчах. Цяпер даложым аб тым, якія ў нас узнікаюць думкі. І я, вядома, буду гатовы выкласці нашы ацэнкі апошніх падзей, у тым ліку ў сувязі з падрыхтоўкай да гэтай “сямёркі” ў сувязі з ініцыятывай Брытаніі, Францыі, Германіі – яны там ультыматум з пяці пунктаў (выставілі. – Заўвага БЕЛТА), паслы прыходзілі, уручылі нам свае пажаданні. Увогуле, ёсць аб чым пагаварыць, і што непасрэдна датычыцца Саюзнай дзяржавы”, – сказаў Сяргей Лаўроў.